2007.03.17 «РОССЕЛЬХОЗБАНК» ЯЛА ПУЛĂШАТЬ («Край родной (Тăван ен)», Кугеси)

Ял çыннипе малалла та ĕçлеме килĕшет çак кредит организацийĕ. Кун пирки унăн правленийĕн председателĕ Юрий Трушин пирĕн республикăна килсен пĕлтернĕ. Хăйĕн шухăшне вăл Районсемпе хуласен пуçлăхĕсен канашĕн тата Наци проекчĕсене пурнăçлассипе республика Президенчĕ çумĕнче йĕркеленĕ канашăн Вăрнарта иртнĕ пĕрлехи ларăвне хутшăннă чух каланă. Николай Федоров Президент та банк агропромышленность комплексĕн аталанăвĕ çинчен калакан нацпроектпа яла валли питĕ пайта условисем сĕннине палăртнă.

Вăрнара каяс умĕн Юрий Трушин пирĕн районта та пулчĕ. Унпа пĕрле республикăн Министрсен Кабинечĕн Председателĕн çумĕ – ял хуçалăх министрĕ М.В.Игнатьев тата ыттисем килчĕç. Ĕçлĕ çыннăн ĕçлĕ визичĕ вăрах пымарĕ пулин те вăл банкăн регионти филиалĕн Кÿкеçри хушма офисĕнчи лару-тăрупа кăсăкланма ĕлкĕрчĕ. Офис çĕнĕ çĕре, расчетпа касса центрĕ пулнă çурта, куçнă та, унти условисемпе паллашрĕ. Кÿкеçри офис иртнĕ çул 132, 9 миллион тенкĕлĕх кредит панă. Сăмахран, Ленин ячĕллĕ кооператив тата «Чурачикское» общество кивçен илнĕ. Кăçал та кредитлă пулас текенсем пур. Тĕслĕхрен, «Прогресс» АУО документсем хатĕрлет. Туянакан техникăна хăйне салука хывса кредит илме май пуррипе те усă кураççĕ хуçалăхсем. Ун пеккисене пилĕк предприятие палăртрĕ офисăн управляющийĕ Галина Глухарева. Уйрăм хушма хуçалăха аталантарма илекенсем те самай. Кăçал кăна кун пеккисем 70 çын (пурĕ 13 миллион тенкĕ ытлалăх) пулнă.

В.ЭВЕРККИ