2007.04.06 Паян тесен паян («Путь победы (Çĕнтерÿ çулĕ)», Вурнары)

– Ака-суха ĕçĕсене эпир паян тесен паян тытăнма хатĕр, – хыпарларĕ хуçалăх ертÿçи Валерий Филиппович Шумилов. – Вăрлăхсем çителĕклĕ, вĕсене 4255 центнер хатĕрлесе хутăмăр. Пур йышши вăрлăхсем те кондициллĕ.

– Техника çителĕклĕ-и?

– Çуракине гусеницăллисем 4, кустăрмаллисем 6 хутшăнмалла. Тĕпрен илсен, туртăм вăйĕ çителĕклĕ. Иртнĕ кунсенче ака-суха ĕçĕсене хутшăнакан механизаторсемпе канашлу ирттертĕмĕр. Вĕсем тырă акмалли сеялкăсене çĕнетме пулчĕç. Сăмах май çакна та палăртса хăварас килет: машинăпа трактор паркĕ çулсерен çĕнĕ техникăпа пуянланса пырать, кăçал урапаллă трактор тата КамАЗ автомашина туянтăмăр, – çураки умĕнхи лару-тăрупа паллаштарчĕ хуçалăх ертÿçи.

Çавалкассисем минераллă удобренисене туянассипе те кăçал ÿсĕмлĕ ĕçлеççĕ, вĕсене 200 тонна ытла хатĕрлесе хунă.

В. МОСКВИН