2007.04.21 ĔÇÇИ ПУÇЛАНЧĔ («Шемуршинский вестник (Шăмăршă хыпарĕ)», Шемурша)

Кăçал уй-хире чи малтанах «Колос» Агрофирма» хупă пĕлтерĕшлĕ акционерсен обществин механизаторĕсем тухрĕç. Кунта сахăр чĕкĕнтĕрĕ акма çĕр хатĕрлеççĕ, пĕрлех тăпрана минераллă удобренисем те хывса пыраççĕ. Халлĕхе ку ĕçе 400 гектар лаптăк çинче пурнăçлама ĕлкĕрнĕ.

Çурхи ĕçсен малтанхи тапхăрĕ – нÿрĕк тытса хăварни тата нумай çул ÿсекен курăксемпе кĕр калчисене сÿрелесе минераллă удобренисемпе апатлантарса хăварни. Пресс-центр пĕлтернĕ тăрăх, «Исток» ОООра çĕртме пуссисене 200 гектар сÿреленĕ.

«Восход» ял хуçалăхĕпе производство кооперативĕнче те ĕççи каçалăкĕ уçăлнă. Çĕр ĕçченĕсем халлĕхе нумай çул ÿсекен курăксене 100 гектар ытларах сÿрелесе хăварнă, кĕр калчисене 50 гектар минераллă удобренисемпе апатлантарнă.

Çавăн пекех, «Шанс» ОООра, «Карлинская» Агрофирма» ЗАОра, «Искра» СХПКра та сÿре агрегачĕсем хире тухнă, малтанхи гектарсем çинче нÿрĕк тытса хăварнă.

Çĕр ĕлкĕрсе пынă май, çак кунсенче ытти хуçалăхсемпе фермер (хресчен) хуçалăхĕсенче те çурхи ака-суха ĕçĕсем пуçланчĕç.

В. МИХАЙЛОВ