Ăратлă выльăх-чĕрлĕх тытакан хуçалăхсене пропагандăласси – çакă çулсерен, кăçалхипе 3-мĕш хут иртет, вăй илсе пыракан республикăри куравăн пĕр енĕ. Сентябрĕн 7-мĕшĕнче иртнĕ çак куравра ял хуçалăх предприятийĕсем, хресчен е фермер хуçалăхĕсем, уйрăм хуçалăхсем хăйсен ăратлă выльăх-чĕрлĕхĕсемпе паллаштарчĕç. Унта ЧР ял хуçалăх министрĕ М.Игнатьев, район пуçлăхĕ А.Князев, Словаки Республикинчи «Инсемас» компани генеральнăй директорĕ Э.Лацко тата ыттисем те хутшăнчĕç.
Тĕлĕнтермĕш тем чухлех пулчĕ çак кун. Мăйракаллă шултра выльăх тăватă, сысна пилĕк, сурăх 2, лаша пилĕк ăрат, 13 тĕрлĕ кайăк-кĕшĕк, 3 тĕслĕ пулă, 2 таса йăхлă марта хурт пуринпе те паллашрĕç пухăннисем. Пĕтĕмпе вара 210 пуç ĕне-пăру, сысна, сурăх, лаша пулчĕ. Чăваш Енрен ĕрчетнĕ экспонатсем» те пулчĕç куравра: «Цивильская» порода тата «Свободовский сыснасем», «Чувашский» карп.
Ял хуçалăх министерствинчен пĕлтернĕ тăрăх Республика тулашĕнчи АПКна пăхса тăракан 16 организаци – Екатеринбургри, Хусанти, Чулхулари, Тюменьри тата ытти те – хăйсен продукцийĕсемпе паллаштарнă. Чăваш Енрисенчен вара çаксем пулнă: «Чувашагролизинг» АУО, «Рацион», «Зоосервис» тулли мар яваплă обществăсем, «Зооветснаб» ПУП. Курав вăхăтĕнче вара выльăх ĕрчетекенсемпе ăратлă продукци туянма 4, 0 миллион тенкĕлĕх, оборудовани илме 3, 5 миллион тенкĕлĕх, малтанхилле килĕшÿ тунă.
Палăртма кăмăллă, пирĕн районтан та курава хутшăнакансем пулчĕç. Паллах, ытларах ял хуçалăхĕсем: «Приволжское» ВСХФПУП, «Атлашевский» ЯХК, Ленин ячĕллĕ колхоз –ЯХПК, «Прогресс» АХО, «Чувашский Бройлер» АУО, «Чебоксарский Бройлер» АУО тата «Чебоксарская птицефабрика» тулли мар яваплă общество. Мĕнех калайăн, призлă вырăнсене тухакансем те пулнă. Ял хуçалăх пайĕнчен пĕлтернĕ тăрăх, акă, «Приволжское» хуçалăхăн ăратлă ĕни 1-мĕш вырăна йышăнчĕ. Çакăншăн хуçалăха I степеньлĕ дипломпа наградăланă. Ленин ячĕллĕ хуçалăх мăйракаллă шултра выльăхпа икĕ номинацире палăрчĕ, киле кĕмĕл тата пăхăр медальсемпе таврăннă. Кайăк-кĕшĕк предприяти ĕсенчен те дипломсемпе укçан премие тивĕçнĕ. Апла пулсан, ăратлă выльăх-чĕрлĕх ĕрчетессипе пирĕн район та маххă паман.
А. АРДАЛИОНОВА.