2007.10.01 УЙ-ХИРСЕНЧЕ («Кошелеевский край (Каçал ен)», Комсомольское)

Çанталăк хăй илемĕпе савăнтарать. Ял хуçалăх кооперативĕсем кашни кунпах усă курасшăн. Уйрăмах çĕрулмине пуçтарса кĕртес ĕçре маттур. Районĕпе пурĕ 971 гектар çинче ĕçе пурнăçланă, 18958 тонна пухса кĕртнĕ. Кашни гектартан — вăтамран 195 центнер. «Асаново» хуçалăх çак ĕçе вĕçленĕ те. Уйрăмах «Слава» ООО, «Дубрава», «Рассвет», «Восток» ял хуçалăх кооперативĕсем, «Урожай» колхоз, «Кызыл сабанча», Минатуллин фермер хуçалăхĕсем, «Слава картофелю», «Нива» агрофирмăсем ку енĕпе тăрăшса ĕçлеççĕ. Уяр çанталăкпа усă курса ĕçе çитес кунсенче вĕçлесшĕн.

«Искра», «Изамбаево», «Правда» хуçалăхсем, Минатуллин, «Кызыл сабанча», Семенов, «Родина» фермер хуçалăхĕсенче пахчаçимĕç кăлараççĕ. 46, 5 гектар çинчен 759 тонна пуçтарса кĕртнĕ.

Хуçалăхсенче кĕрхи çĕртме тăвас ĕç те хĕрÿ пырать. Сентябрĕн 27-мĕшĕ тĕлне 6000 гектар çĕре сухаланă, 4000 гектар çинче кĕрхи тырăсем акса хăварнă.

Районта «Асаново», «Алга» ял хуçалăх кооперативĕсем хăмла çи-тĕнтернĕ. Ăна та пухса кĕртмелле.

Кĕрхи ĕçсене вăхăтра та тухăçлă пурнăçласчĕ.